Christa le Roux - 'n Lewe

“Min het ek in 1964 kon dink dat ek skaars ’n paar jaar later deel van La Rochelle se personeel sou word. Toe ek in Januarie 1969 as jong en onervare onderwyseres daar begin skoolhou het, was dit nogal met vrees en bewing. Ek was slegs enkele jare vantevore nog ’n leerling daar en nou moet ek my in die leeuhok van my oud-onderwyseresse begewe. “Ek was veral baie onseker oor hoe mej. Le Roux my sou aanvaar. Groot was my verbasing toe sy my die eerste dag as ‛Mej. Cilliéʼ aanspreek. En by daardie aanspreekvorm het dit gebly, tensy ons alleen in haar kantoor was. “Sy was ’n baie intelligente jong vrou en soos reeds genoem, ’n uitstekende onderwyseres, leier, skoolhoof en rolmodel. So het sy ook ons reeds gemerkte Afrikaans-vraestelle met haar groen pen deurgewerk! Wanneer ons klas gegee het, mag ons glad nie gesit het nie. Al was jy hóé moeg – staan sal jy staan, gestewel en gespoor met hoë hakkies en sykouse. “Mej. Le Roux was, hoewel klein van postuur, ’n formidabele persoon. Ons eer haar nagedagtenis.” Hilda Smit (née Albertyn), oud-Larrie en oud-onderwyseres: “Ek was in st. 8 toe Juffrou Le Roux by La Rochelle begin het en ons was vir haar so bang soos ’n bok vir ’n skoot hael. Later het ek besef, en ek dink sy het dit ook later gesê, dat dit vir haar baie moeilik was om daar in te stap as skoolhoof, want die meeste van die (formidabele) onderwyseresse wat sy as leerling daar gehad het, was nog op die personeel en nou was sy hulle skoolhoof. Ek dink sy het die situasie hanteer deur die uitlewing van haar integriteit, hardwerkendheid, lojaliteit aan die skool en ook die feit dat sy die regte besluit kon neem en nie daarvan afgewyk het nie, al was dit nie die gewildste en aanvaarbaarste vir almal nie. Sy was beslis nie ’n ‛people pleaserʼ nie en het gekonsentreer op daardie dinge wat in haar oë korrek was. “As Larrie het ek nie baie kontak met haar gehad nie, maar tog het sy ’n geweldige invloed op my lewe gehad en het sy my laat besef die regte pad is die veilige pad. Ek onthou steeds haar motto: ‛Dink voor jy inkʼ, wat sy altyd in haar praatjie voor die eksamen by ons ingehamer het. Ons ‛Old Girlsʼ bly lief vir ons skool én ons bly lojaal. Dit sê vir my dat, wat ons daar ondervind het, reg en goed was. ’n Skoolhoof speel ’n groot rol daarin om dit te vermag.

Christa le Roux – ’n Lewe 50

Made with FlippingBook Digital Publishing Software