Christa le Roux - 'n Lewe

Hierdie huldeblyk aan die skoolhoof van die Hoër Meisieskool La Rochelle vir byna dertig jaar, die enigmatiese Christa le Roux – mej. Le Roux, Juffrou Le Roux, Christa, Daisy – toon haar in al haar fasette. Daar’s die jong Christa wat van kleins af presteer en met al wat prestige-ryke toekenning wegstap. As La Rochelle-leerder, die Kaaplandse top-Matrikulant van haar jaar. Die student wat vier kwalifikasies een ná die ander verwerf: die BA, Honneurs, Magister én ʼn onderwysdiploma; die laaste twee gelyktydig in een jaar, en dit terwyl sy lank siek was. Haar eerste onderwyspos op ouderdom 23 was aan ’n meisieskool genaamd Rocklands. Gepas, want dit was net ’n kwessie van tyd voor sy hoof sou word van daardie ánder “rock” – háár La Rochelle aan die voet van die Paarl se pêrel van ’n massiewe granietrots. Daar het sy vir byna drie dekades die leiding geneem. Tog, ondanks soveel bewese suksesse, het self-twyfel soms geknaag – ’n bewys van haar menslikheid en nederigheid. Hierdie huldeblyk, soomloos saamgestel deur Lizette Vlotman (Murray), vertroude oudleerder en hoofmeisie van 1970, is ’n liefdesbetuiging én dankie-sê aan ’n unikum-mens. Daar was net een soos sy. Dankie, Daisy.

Prof Lizette Rabe, oud-redakteur van SARIE en oud-hoof van die Departement Joernalistiek, Universiteit Stellenbosch