Christa le Roux - 'n Lewe
WYSE WOORDE
Teachers open the door . . . you enter by yourself. Confucius [soos in Engels vertaal]
M ej. Le Roux was nooit prekerig nie. Sy het nooit met haar kennis of wysheid te koop geloop nie. Elke saalboodskap of prysuitdelingtoespraak of afskeidsboodskap het egter van deurleefde wysheid getuig. Linda Marais, (née Smit, oud-leerling en later skoolhoof van Laerskool La Rochelle), onthou: “Haar wyse raad aan ons opgewonde groep matrieks: ‘Daar is sekere dinge waarmee jy met gerustheid in die lewe kan eksperimenteer, maar daar is ook dié waarmee jy dit nooit waag nieʼ ... hierdie woorde is nog steeds my kompas in onsekerheid.’” Aanhalings uit toesprake: Waarna strewe ons? In haar afskeidsboodskap aan die 1968-matrieks sê mej. Le Roux onder andere: “Die Erekode wat in 1946 deur mej. Münchmeyer en die leerlingraad opgestel is, begin met hierdie veelseggende woorde: Ons strewe ... Watter mens kan ooit iets bereik wat die moeite werd is as hy nie strewe nie, met ander woorde, ’n doel voor oë het, ’n ideaal koester, ’n mikpunt stel? “Waarna strewe ons dan? Waarna moet julle strewe? Dr. J.A. Heyns het onlangs geskryf: Die begin van sukses is nie om buitengewone prestasies te behaal nie, maar om die gewone dagtaak met buitengewone toewyding te verrig. Sukses is nie die skat wat alleen deur mense met buitengewone talente ontdek word nie ... Elkeen wat sy plig nie slegs met ywer begin nie, maar dit met getrouheid dag na dag uitvoer, hy sal sukses behaal ... “Een van die inspekteurs wat ons skool onlangs besoek het, het gesê dat meisieskole ’n spesiale taak het, want hulle is in ’n baie besondere mate die kweekplekke van die moeders van ons volk. Watter mooier regverdiging kan daar wees vir die bestaansreg van ’n skool, maar ook watter groter verantwoordelikheid kan daar rus op die leerlinge wat ’n skool verlaat? ...
45 Christa le Roux – ’n Lewe
Made with FlippingBook Digital Publishing Software