Christa le Roux - 'n Lewe
Die woorde dra ’n gevoel van behoort. En geborgenheid. Van veilig wees. En versorg. Vanaf 1963 was die huis in Du Toitstraat vir gesinne hul “ Vier mure teen die suidewind ”, die plek waar hulle kon leef en lag en liefhê en geborge kon voel. En nou is Huis D.C. le Roux die woonplek van jong La Rochelle-dogters. Dieselfde dinge wat die huis al die jare ’n veilige en geborge tuiste gemaak het, geld steeds. Ek wil kortliks vier dinge noem wat deur die jare van hierdie besondere huis ’n tuiste gemaak het. Boeke was al die jare deel van hierdie huis. Ek onthou my pa se studeerkamer, met vol boekrakke tot teen die dak. Ek het dikwels daar gaan sit en lees. Ek
onthou die gevoel van beskutting wat dit geskep het. Juffrou Le Roux, as taalonderwyser en boekliefhebber, het tot met haar dood ’n swart notaboekie gehad waarin sy die titels van boeke wat sy nog graag wou lees, aangeteken het.
Waar daar kinders is, is daar lag en vreugde en vrolikheid. Naweke en vakansietye was ons huis die bymekaarkomplek van die jongklomp.
En toe ek onlangs saam met Elsabé Conradie deur ons ou huis stap, het ek oral boeke opgelet. Op ’n bed. ’n Skryftafel. ’n Rakkie bokant ’n lessenaar. My hart het sommer gesing. Anne Quindlen, Pulitzer-pryswenner, het geskryf: Books are the plane, and the train and the road. They are the destination, ánd the journey. They are home. Waar daar kinders is, is daar lag en vreugde en vrolikheid. Naweke en vakansietye was ons huis die bymekaarkomplek van die jongklomp. My ma was bekend vir haar gasvryheid. So het ons soms die onderwyseresse, onder ander ook Juffrou Le Roux, vir Sondagmiddagetes ontvang. Dan het ons ’n ander sy van ons streng skoolhoof gesien wat daar – met almal rondom die tafel – lag en staaltjies deel. Soms het Juffrou Le Roux by my ma kom tee drink. Dan het ek en my sussie, Hannetjie, in die kamer gegiggel. Ons kon nie glo dat sy oor dinge soos hoede en skoene gesels nie! My groot wens is dat die inwoners van Huis D.C. le Roux sal lag en vrolik wees en vreugde vind in die klein dingetjies van elke dag.
Christa le Roux – ’n Lewe 60
Made with FlippingBook Digital Publishing Software